Vos vau parlar de l’emplec que fau dempuèi lo mes de novembre que e qu’explica en partida (se sèm onèstes i ajustarem la canha) mon retard dins la licéncia.

A mes d’octobre passat, mudèri a Lion per rejónher mon amor, la Milon, que fa un master de filosofia. Òc, de filosofia. Mas es una persona normala, vos’n faguetz pas. Veniái d’acabar mos estudis d’engenhaire en informatica, e cercavi de trabalh. Al cap d’un mes ne trobèri dins una entrepresa pichona, un burèu d’estudis de pollucion dels sòls. Avián besonh d’un desvolopaire per un projècte d’aplicacion tocant las bosigas.

Aquel projècte que ne soi lo cap se fa en collaboracion amb una autra entrepresa pichona que porgís sos pròpris desvolopaires. Respond a un besonh exprimit per l’Ademe (Agéncia De l’Environament e de la Mestresa de l’Energia) d’arrestar, o al mens de redusir, l’artificializacion dels sòls. S’agís d’una aplicacion a destinacion de las collectivitats o dels grops de construccion per melhor gerir sas bosigas (friches en francés, dins lo sens d’una pèça qu’a arrestadas sas activitats, un èrm). L’enjòc de las bosigas es fòrt per l’Ademe, sustot dins las ancianas regions industrialas que n’an fòrça. Las collectivitats administran tot aquò sus papièr o dins de fichièr informatics que se pèrdon e que son pas adaptats. La proposicion es un utís informatic, en linha, especializat dins la gestion de las bosigas que permetrà als clients de las seguir tot lo long de sa vida :

• identificacion de la bosiga (ajudats per una analisi dels imatges satellits e de las donadas fonsièras)
• qualificacion precisa de sas caracteristicas e de son estat de pollucion
• proposicion e planificacion de las òbras de despollucion
• seguida de las òbras de despollucion puèi de bastiment
• vision d’ensems de totas las bosigas del territòri e de son estat d’avançament

En un mot, aquel utís permetrà de recampar sus una sola plataforma tot çò que concernís la reabilitacion de las bosigas per i bastir dessús e arrestar de s’espandir sus las pèças agricòlas.

Aquí donc çò que fau de mas jornadas : desvolopar aquela aplicacion, trapar d’idèas per la melhorar o de biaisses de la melhorar tecnicament, organizar lo trabalh dels autres desvolopaires. La comuna de Sant-Estève, qu’a un fum de bosigas pr’amor de son anciana activitat minièra, es partenària del projècte e nos fa de retorns sus l’aplicacion, que pel moment son plan positius !