Lo Parpalhon Blau 🦋

Soi acostumat de recercar de temps en temps lo mot “occitan” sus YouTube, per véser se quicòm de novèl es estat fait. Fau aquò cada sièis meses a quicòm prèp dempuèi que soi al licèu, per curiositat. Solide, a cada còp soi un pauc decebut de çò que tròbi. Es pas que siá pas interessant, son de collectatges, de reportatges, d’emissions de Viure al País, etc… qu’aimi fòrça agachar. Mas quand piqui “occitan”, es per trobar de contengut que parla precisament de la lenga occitana, quicòm de novèl, de fresc, de trabalhat !

E l’an passat, me’n rapèli plan, tombèri sus quicòm de novèl : una vidèo que s’apelava “Gabrièu speaking Nissart Occitan”, sus una cadena que parla de lengas en general. L’agachèri e me pensèri qu’aquel jove semblara a l’encòp fòrça simpatic e fòrça interessant, l’auriái plan volgut rencontrar ! Èri content de véser de contengut novèl, amb un jove que parla plan en mai d’aquò, mas a aquel moment èri luènh de me dobtar de çò qu’aquel Niçard aviá dins l’idèa.

Es justament per parlar de sa cadena YouTube actuala qu’escrivi aquel article. Dempuèi un parelh de meses ai descobèrt que s’èra metut, sus sa cadena polidament nomenada “🦋 Parpalhon Blau”, a far de vidèos fòrt qualitadosas en occitan. Comencèt per una seria de leiçons per aprene las basas de l’occitan, vaquí la primièira :

﹒

Es fait d’un biais plan intelligent. Se ieu aviái degut far de vidèos, de’n primièr serián pas estadas tant qualitadosas, e sustot auriái tot metut en occitan ! Mas el, emai tot lo contengut audiovisual siague en occitan, fa los imatges de presentacion en anglés per tocar mai de mond. Parla doçamenton, explica tot e pron lo temps d’illustrar amb d’exemples. Pensi qu’es una plan bona introduccion a l’aprendissatge de l’occitan per de debutants.

Naturalament, per un occitanofòn las leiçons semblan un pauc longanhas. Mas recentament Gabrièu publiquèt d’autras vidèos, una ont respond a las questions de sos abonats e una autra qu’es una vlòg (vidèo blòg) ont presenta son material e sas tecnicas per se filmar. E es aquò que m’agrada mai : que l’occitan prenga sa plaça dins de domenis de la vida vidanta, que se parle de quicòm mai que de la lenga ela meteissa ! Lo trabalh i fa pas paur : dins son vlòg justament, a jostitolada la vidèo dins 8 lengas ! Occitan, anglés, francés, espanhòl, portugués, italian, alemand e romanés.

Coma ieu ai pas léser ni mai lo coratge de far de vidèos atal, ai causit d’i balhar l’estrena via Tipee, una plataforma per sosténer los creators de contengut sus Internet.